Një vendim i nënshkruar nga kryeministri i vendit, Hashim Thaçi, ka bërë që tre zyrtarë të agjencive të ndryshme qeveritare të mbesin pa punë.
Enti i Statistikave, Agjencia Pyjore dhe ajo Kadastrale e Kosovës, nga dita e martë kanë mbetur pa drejtuesit e tyre. Por vetë ish-drejtuesit e këtyre institucioneve të cilat janë agjenci që financohen nga buxheti i vendit, hezitojnë të komentojnë vendimin e kryeministrit.
Avni Kastrati është njëri prej tre të shkarkuarve nga detyra që mbante në Entin e Statistikave të Kosovës (ESK). Në arsyetimin kryeministrit për shkarkimin e tij thuhet se vlerësimi negativ për punën e Kastratit ndërlidhet me shkeljet e vazhdueshme që janë evidentuar edhe në raportet e Auditorit të Përgjithshëm, duke përfshirë vërejtjet për aktivitete të dyshimta të prokurimit, në kundërshtim me legjislacionin në fuqi.
“Në përgjithësi, Kastrati ka dështuar në menaxhimin efikas të ESK-së dhe nuk ka arritur rezultatet e kërkuara”, thuhet në këtë njoftim zyrtar.
Por Avni Kastrati, ish-kryeshef ekzekutiv i ESK-së, thotë se i ka lexuar arsyet që ka dhënë kryeministri në vendimin e tij për shkarkim nga detyra.
“Unë nuk kam koment për këtë”, thotë Kastrati për Express, por sqaron se ka pesë muaj që i ka skaduar kontrata për atë pozitë. “Kontrata nuk mund të vazhdohej pa u formuar Komisioni për Emërime të Larta Publike”, thotë Kastrati.
Ish-zyrtari i lartë i ESK-së tregon se megjithatë, arsyen për shkarkimin e tij më mirë duhet ta dinë ata që e kanë marrë një vendim të tillë, i vetëdijshëm se jo të gjitha projektet e parapara nga ESK-ja janë realizuar.
“Janë disa projekte që nuk varen vetëm nga ne dhe për këtë arsye nuk kanë ecur mirë”, shpjegon ai, duke qenë i qetë sa u përket dyshimeve të mundshme për korrupsion.
“Nga ky aspekt, jam fare i qetë, jo vetëm për pozitën ku kam qenë, por edhe në jetën time jashtë kësaj detyre”, thotë Avni Kastrati.
I shkarkuari tjetër është Muzafer Luma, kryeshef i Agjencisë Pyjore të Kosovës (APK). “Arsyet e vendimit ndërlidhen edhe me të dhënat e ofruara nga raporti i Auditorit të Përgjithshëm, e që konsistojnë me vërejtje për aktivitete të prokurimit në kundërshtim me legjislacionin në fuqi, si dhe dhënie në shfrytëzim të tokës pyjore në kundërshtim me ligjin”, thuhet në komunikatën e Kryeministrisë, duke u përmendur edhe disa arsye të tjera.
Por pavarësisht akuzave mjaft të rënda që i bëhen, Muzafer Luma nuk dëshiron as t’i kundërshtojë këto arsyetime të Kryeministrisë, në lidhje me shkarkimin e tij.
“Nuk kam koment. Këto janë procese dhe individët janë më të vegjël sesa proceset”, thotë Luma për Express. Ndonëse është shkarkuar, ai thotë të jetë i gatshëm t’i ofrojë përvojën e tij Qeverisë kurdo dhe kudo që i nevojitet. “Sa për të tjerat, janë organet kompetente që mund ta vërtetojnë. S’kam çfarë të shtoj”, thotë Muzafer Luma për Express.
Të njëjtën ditë, kryeministri Hashim Thaçi ka vendosur të shkarkojë nga detyra edhe kryeshefin ekzekutiv të Agjencisë Kadastrale të Kosovës, Hamit Basholli, si pasojë e rezultateve të dobëta në punën e kësaj agjencie, si dhe mosmenaxhimit efikas të saj.